شبابنا مالـُه مال حالـُه
كتبهاأمير الجزيرة ، في 3 مايو 2009 الساعة: 14:01 م
يا شبابنا مالك مال حالك
إيه اللى بدِّل أحوالك
مفضوح وباينة أفعالك
كنت زمان شهم ومجدع
,,
تايه بتفعل ما بدالك
خالط حرامك بحلالك
يا عم لـِمْ أنجالك
بـَدَل ما تلقى العار جالك
,,
شبابنا من بعد رجولة
أخلاقه صارت محلولة
وسواعده صبحت مشلولة
من غير هدف فى الدنيا مبـَرطَع
,,
صـِرماح وداير على راحته
ع الناصية ماشى بيتقصـَّع
طول ليلـُه سهران يا بجاحته
الضـُّهر قايم يتمطـَّع
,,
دا واد رقيق رقة بناتى
ونَـىْ خالص يا خواتى
لو جيت اسلـِّم مرَّه عليه
أخاف تغير مِنـّه مراتى
,,
وادى واد مسبسب وخنافس
لبنات حارتنا بينافس
فى لبانة يندُغ ويطرقع
وحلق فى ودنـه ياناس لابس
,,
وده سلامـُه هاى شـِلـَّة
ما عارفلـُه جنس ولا مِلـَّة
وعشان ما يبقى بنت تمام
ناقص بلوزة وجونيلـَّة
,,
الوش أحمر ومزنهر
وبنطلونه متهرهر
لتحت وسـْطه ومتسنتر
على حتة عيب لو تتفسـَّر
,,
واخد الذكورة بالنيـَّة
محتاج يا ناس كشف هوية
أمرُه اختلط والله عليـَّا
ما اعرف دا واد ولاَّ وليـَّة
,,
والبنت غارت من اخوها
الخيبة والعيبة طالوها
وسط الرجال لم عـِرفوها
من صنف حوَّا ما فيهاشى
,,
من بعد يشمك والبيشة
قاعدة بتشرب فى الشيشة
ويـَّا السيجارة الترويشة
ضحكتها ضحكة حشـَّاشى
,,
أشوفها قلبى بيتحسـَّر
كانت زمان زى السكر
عن كل عين كان تتستـَّر
زى النسيم ما تشوفهاشى
,,
دلوقتى دايرة بتتمنظر
بشعر جارسون متقصـَّر
على جسم سايب متخدَّر
فى أنوثة صبحت ع الماشى
,,
دى عايزة تقلـِب بتفكـَّر
وصوتها قرَّب يتخنشر
يكونشى ناوية تستدكر
ماشيتها ماشية ضبـَّاشى
,,
والشابـَّة مايصة بتترقـَّص
قوامها باين متفصص
وشبابنا واقف مترصـَّص
من رد فـِعـْله بتستهتر
,,
الصدر بارز شوف نحته
هل من مبارز فى مساحته
وجينز كاشف إيه تحته
من غير لا حزَّر ولا فزَّر
,,
وشيطانها قاعد يتنطط
قدَّامها فرحان ومزقطط
عمـَّال يفصـَّل ويخطط
أزياء تفسـَّر جسمها أكتر
,,
قال إيه مواكبة للموضة
ما تتلبس حتى فى روضة
وبارفانات جايبة حموضة
ساعة ماشوفها بتوتـَّر
,,
سابت ضفايرها بخاطرها
سـِكـْنـِتْ بهانة كوافيرها
إيه تعمل الماشطة وغيرها
فى وش له كود متشفـَّر
,,
حلق ودانها فى مناخيرها
نفخت نهودها وشفاتيرها
صبغت شعورها وضوافيرها
ليه ع الطبيعى بتتبطـَّر
,,
كل اللى شاغل تفكيرها
إزاى هتدفع فواتيرها
وروجها ويـَّا مانيكيرها
بألوانات أحمر واصفر
,,
يا ولاد بلدنا ان جيتوا للحق
حطـّيت صوابعى العشرة فى شق
ما تسيبكوا بقى م الأومبو اللأ
أحسن بلدنا بتتأخر
,,
إرجع لعقلك وخلاصك
وكتاب نبينا وكراسك
قبل ما ينضـَبْ إحساسك
إلحـَق قوام قوم واتشطـَّر
,,
أمم كتيرة بتتقدم
واحنا ما زلنا محلـَّك سر
بكره هنرجع نتندِّم
أستر يارب وبـِعد الشر
,,
قبل ما بكره دا يجينا
ونقول يا ريتنا كـُنـَّا وكان
واجب علينا بإيدينا
تبقى بلدنا فى أعلى مكان
,,
ـــــــــــــــــــــــــــــــــــــــــــــــــــــــــ
التصنيفات : شعر عامى | السمات:شعر عامى
أرسل الإدراج | دوّن الإدراج
مايو 3rd, 2009 at 3 مايو 2009 3:56 م
هييييييييييه …الاولى …
شكرا أميرنا الغالى ….
احجز مكان و أقرأ … وراجعة
فوووووووووو
مايو 3rd, 2009 at 3 مايو 2009 4:12 م
يسلموا اديك اميرنا الغالى …
يارب اميرة تقطع اجازتها و تيجى تقراها .. هههههههههه
بس انا ليا راى …
كل اللى حاصل ده نتيجة الهرمونات والكيماويات اللى فى الاكل …
العيب مش فى العيال و الله صدقنى و ما تضحكش من كلامى
كل ده بداية خلل هرمونى نهايتة خلل وطفرات فى التكوين الجينى للشعب ككل ..
بدليل ان لما بيحصل حاجة محلية او عالمية تلاقى الكل اعترض وظهرت الشهامة و الرجولة المركونة فى الاعماق ..
اما البنات فهم غلابة برضه …
ياه لسه فاكر اليشمك وروايات نجيب محفوظ والضفاير …
وعايزنا نرجع زى زمان … قول للزمان ارجع يا زمان …
دى قراية اولى ولسة …
كل قراية بفكرة جديدة …
ويسلموا اديك
ناديه طه ..
بلاش دودو
ههههههههههههههه
مايو 3rd, 2009 at 3 مايو 2009 4:16 م
ما تسيبكوا بقى م الأومبو اللأ
==============================
معقولة حد يسيب الامبو اللأ و الممثل احمد حلمى …
ياراجل ده هو اللى مصبرنا ومفرفشنا ومضحكنا ..
ربنا يخليه …
تحياتى اميرنا الغالى
مايو 3rd, 2009 at 3 مايو 2009 5:48 م
حوريتنا نادية طه
إنتى الأولى دايما طبعا هنا
بس فى المدرسة والجامعة بأه مش عارف
حضرتك أدرى .
ههههههههههه
مايو 3rd, 2009 at 3 مايو 2009 6:09 م
وأنا كمان والله أتمنى إن عائلة مدام أميرة كلها تقراها مش هىّ بس
طبعا دا شرف كبير لى .
بس بجد حلوة ولا إنتى بتجاملينى ؟؟
إوعى تكونى ..
يعنى اللى بشوفه ده خلل هرمونى فى التكوين الصينى ههههه قصدى الجينى
نتيجة الأكل اللى إحنا بناكله ؟؟
يبأى أنا صح ومتفقين فى الرأى لما قلت قبل كده فى إدراج سابق
دا الأب مصرى والأم مصرية
والواد بيطلع طبعو مش لينا
ما دام بناكل من إيدين غيرنا
إزاى هيطلع هو منِّينا
وأنا معاكى إن لسه الشهامة موجودة برضو فينا بس أنا بتكلم على
فئة عريضة برضو ومش قليلة من الشباب موجودة دلوقتى .. ولا
البنات ، إنتى بتقولى عليهم غلابة ؟؟ أشك .. بصراحة أنا بشوفهم
يعنى حاجة كده تشرَّف .. ( بس بالعكس ) .. البنت من دول تبأى
لسه ما فقستش من البيضة ، ومعبـّرة عن نفسها تعبير يعنى ما
أقولكيش .. يا ترى ده برضو راجع للغذاء والأكل وكده ؟؟ .. يعنى
ده طبيعى مش سيليكون ؟؟ ..
أما بالنسبة لزمان وأيام زمان عاوز أقولك حاجة يا أستاذة
نادية أنا لما بشوف الصور الأبيض واسود الخاصة بالناس بتوع زمان
دول بحس إن فيها حاجة مختلفة شىء سحرى مااقدرش أعبر عنه ، بحس حتى
إن كل حاجة كان مختلفة ( للأحسن طبعا ) حتى الهواء حتى قسمات
وتقاطيع الناس تشعرى فيها بالطيبة والراحة ، ولاَّ كل زمن وله
متاعبه ووجعه ؟؟ .. بس يهيأ لى برضو إن الناس كانت مختلفة عن
الأجيال اللى موجوده دلوقتى .
بس على رأيك .. عايزنا نرجع زى زمان قول الزمان إرجع يا زمان
والله أوقات كتير بتمنى إنى كنت عشت الزمن ده .
مايو 3rd, 2009 at 3 مايو 2009 6:18 م
أما فيما يتعلق بالأومبو اللأ
فلا تعليق أحسن ألبـَّخ
………………….
نورتى المكان كله بطلتك البهية ياحوريتنا
صحيح أخبار المارد إيه ؟؟
إن شاء الله يكون بخير
دا حتى وحشنى ..
إن شاء الله إمتى الجزء الخامس ؟؟
مايو 3rd, 2009 at 3 مايو 2009 7:24 م
الصفحة اتفتحت اهه اخيرا ..لما نشوف
==================
حوريتنا نادية طه
إنتى الأولى دايما طبعا هنا
بس فى المدرسة والجامعة بأه مش عارف
حضرتك أدرى .
ههههههههههه
=======================
ههههههههههه
المدرسة وما ادراك ما المدرسة … والله ما خرجت منها بحاجة ..
و الجامعة و ما احلا ايامها … امتحانات وقرف ولكاعة ..
هيييييه .. بكتب زيك اهه ..
و هو اللى مضيع كل العيال اللى بتتكلم عنهم دول ايه غير الدراسة ؟؟؟؟
كل واحداهله حاططين له هدف يكون الاول و يجيب الديب من ديله
يفضل يذاكر ويقلق و يشيل شنطةكتب على قلبةاتقل منه من قبل ما يطلع من البيضةوبعدما يضيع معظم شبابة يلاقى نفسه مركون فى القهوة او النت كافية ..
مايو 3rd, 2009 at 3 مايو 2009 7:28 م
اهلا اهلا .. اميرنا الغالى
بس ايه مدام اميرةواستاذة ناديه دى ؟؟
مافيش بيننا الكلام ده ..
انا قلت لشخص معين يتكلم عنى بادب و احترام بس هو لوحده
مش انت ولا اصدقاءنا الغاليين هنا
مايو 3rd, 2009 at 3 مايو 2009 7:31 م
بس بجد حلوة ولا إنتى بتجاملينى ؟؟
——————–
انت عارف انى مش بجامل ..
بجد روعة ..
عجبنى انى حسيت انك بتكتب بابوة يعنى عتاب مع تمنى ان الحال يتصلح
مش مجرد نقد او سخرية
مايو 3rd, 2009 at 3 مايو 2009 7:40 م
يعنى اللى بشوفه ده خلل هرمونى فى التكوين الصينى ههههه قصدى الجينى
نتيجة الأكل اللى إحنا بناكله ؟؟
يبأى أنا صح ومتفقين فى الرأى لما قلت قبل كده فى إدراج سابق
دا الأب مصرى والأم مصرية
والواد بيطلع طبعو مش لينا
ما دام بناكل من إيدين غيرنا
إزاى هيطلع هو منِّينا
————————-
فعلا اتفق معاك فى الراى ده …
دى نقطة ..
النقطة التانية ان فيه بنات للاسف نتيجة توفر سبل المعلومات عندهم بياخدوا هرمونات من غير الرجوع لطبيب لمجرد تكبير اجزاء معينة من الجسموده بيعمل خلل هرمونى خطير فعلا
ولوكنت متابع للاخبار الطبية هتعرف ان سرطان الرحم منتشر دلوقتى حتى بين البنات اللى مش متجوزين ..
تعرف انا بتصور لوالاجيال تتابعت على الخلل ده مع ارتفاع سن الزواج بعدكدة الذرية هتسوء وهتكون مريضة ضعيفة
ربنا يستر
مايو 3rd, 2009 at 3 مايو 2009 7:50 م
وأنا معاكى إن لسه الشهامة موجودة برضو فينا بس أنا بتكلم على
فئة عريضة برضو ومش قليلة من الشباب موجودة دلوقتى .. ولا
البنات ، إنتى بتقولى عليهم غلابة ؟؟ أشك .. بصراحة أنا بشوفهم
يعنى حاجة كده تشرَّف .. ( بس بالعكس ) .. البنت من دول تبأى
لسه ما فقستش من البيضة ، ومعبـّرة عن نفسها تعبير يعنى ما
أقولكيش .. يا ترى ده برضو راجع للغذاء والأكل وكده ؟؟ .. يعنى
ده طبيعى مش سيليكون ؟؟ ..
——————————–
و الله يا امير يا خويا فيه بنات عايزين الادب و التربية انا بقول غلابة لانهم مش لاقيين حد يراعيهم
يعنى احنا مثلا اقصد جيلى و جيلك ..كان التليفون فى صالة البيت والاب هو اللى يرد و عارف صديقات بناته و اسرهم وكان فيه رقابة ..دلوقتى الموبايل بوظ اخلاق البنات
و الانترنت … تلاقى الكمبيوتر فى اودة البنت وفيه كاميرا و تعيش حياتها تصاحب و تتكلم وتقلع وتلبس ادام الكاميرا عشان تعجب ..آسفة ده الواقع .. برضه مافيش رقابه و لا اب و لا ام
تعرف مرة الكمبيوتر باظ عندى و اضطريت اروح لنت كافية ..
و الله شفت العجب ..بنات 15 و 16 سنة بلبس المدرسة و تلاقيهم كل اتنين تلاتة ادام كمبيوتر بيكلموا واحد عبيط و بيضحكوا و يتسلوا و يقروا كلامه لبعض و يتتريقوا عليه و هو متشعلق فى حبال الهوا
مش كل دة تضييع للعمر و الوقت ..؟؟؟
مايو 3rd, 2009 at 3 مايو 2009 7:57 م
فعلا الواحددمه بيتحرق من المناظر دى ..
مرة كنت فى المنتزة يوم الجمعة ووقت الصلاة دخلنا كلنا مسجد نصلى
المسجد فيه اسدالات للى مش لابسة عباية بناخدها نصلى بيها ونرجعها ..بدانا الصلاة و جايين نسجد حسيت بقلبى اتخطف و غصب عنى قلت استغفر الله العظيم .. لقيت البنت اللى جانبى وهى بتسجدلابسة بادى قصير خالص ومافيش تحتة حاجة و ظهرها كله باين ..
بعد الصلاة بقول لها يا انسة فيه اسدال دارى نفسك بصت لى باصة كان ناقص تاخدنى قلمين و لوت بوزها كانى شتمتها …
تكونش بتتمنظر ادام الملايكة .. ههههههه
فين الاهل … هذا هو السؤال …
مايو 3rd, 2009 at 3 مايو 2009 8:01 م
والله أوقات كتير بتمنى إنى كنت عشت الزمن ده .
———————–
عندكحق و الله … كل كلامك صح و تقريبا كل الناس عندهم نفس الشعور
ياريت …
مايو 3rd, 2009 at 3 مايو 2009 8:12 م
أما فيما يتعلق بالأومبو اللأ
فلا تعليق أحسن ألبـَّخ
………………….
هههههههههههه
لبخ و لا يهمك…
ساعات الواحد بيكون عايز اى حاجة تخرجه من همه …
فى الزمن الجميل كنا بنقرى اجاثا كريستى .. ارسين لوبين مثلا
انا كان عندنا شجر فى الجنينه كنت بطلع اتسلق شجرة الجوافة والتوت ولا الرمان اقطف واتسلى و ابص للسما ..
دلوقتى مافيش حاجة خالص .. لا حول و لا قوة الا بالله العلى العظيم
كل الفيلل اتحولت لعمارات ..
كنت بشوف البحر من البيت عندنا .. دلوقتى العمارات خبت حتى السما ..
تصدق لما بحكى حكايات لاولاداخواتى الصغيرين بيسالونى يعنى ايه سحاب يعنى ايه كتاكيت .. عمرهم ما شافوا ماعزصغيرةولا بط صغير ..
اهم دول اللى بيصعبوا على بجد
دوشتك معايا …
معلش موضوعك حلو و الكلام معاك احلى ..
0000000000000000
المارد بيسلم عليك…
هو فى الطريق ….
مايو 3rd, 2009 at 3 مايو 2009 9:30 م
اميرنا الغالىىىىىىىىىى
اقتباس
دا أنا ما سدقت جاتلى حالة إنشكاح فكرى واندمجت .
0000000000000000000
حلوة حالة الانشكاح الفكرى دى …هههههههه
اهدى براحتك غالص ربنا يهديك وينور فكرك ويرجع لك انشكاحك
عشان كدة انا كل ما اكتب تعليق آظلله و آخده كوبى عشانما اضمنش الظروف
يا اللا مستنياك
مايو 3rd, 2009 at 3 مايو 2009 10:14 م
عدنا
………….
لأ ما هى توجهات ومفاهيم الآباء والأمهات إختلفت كمان دلوقتى
كانت زمان الأم تقف تنادى على إبنها اللى بيلعب فى الشارع من
البلكونة وتقول له :- إطلع يا منيل على عينك ذاكرلك كلمتين
ينفعوك بدل ما تيجى آخر السنة وشايلـَّك ملحقين .. إطلع يا بو
ملحق .. إطلع قبل ما ابوك ييجى يلاقيك فى الشارع هيقطـَّعك ..
العواف يا ام محمود .. شوفتى العيال ياختى اللى يتعبوا القلب ..
وترد عليها أم محمود :- سا النور يا حبيبتى ( وخلـّى بالك من
ساالنور دى .. سا الخير وسا النور .. بيخطفوها خطف هههههههه ..
ويدخلوا مع بعض بأه فى مواضيع المحشى والكفته وتخبيط الحلل ..
ههههههههه
دلوقتى بأه يدخل الأب على إبنه اللى قاعد مكفى على الكتاب ومقـَّق
عينيه فيه ويقول له :- ما تقوم يابنى إنزل إلعب فى الشارع شوية
كورة يمكن حد يكتشفك وتطلع لعيب ولاّ موترب بترقيق الطاء .
ما هو دلوقتى اللى تلاقى الملايين بتجرى فى إيديهم بالساهل يا إما
لعيبة الكورة ( مع إنى بحب الكورة وحرّيف فيها كمان .. ههههههه )
يا إما المطربين يا إما الممثلين يا إما بتوع الهشـّك بشـّك لا مؤاخذة
الرقاصات يعنى .
الممثلة من دول تطلب 5 مليون جنيه فى المسلسل وتلاقى اللى بيدفع
لها والرقـّاصة ( وعفوا إنى بقول الرقـّاصة مش الراقصة ) بتتفق
على الحفلة بالدولار وتلاقى اللى بيدِّيها والشباب بيتهافتوا على
مطرب ما ، مع إن مافيهوش حاجة تشد يعنى غير …….. أستغفر الله
العظيم اللهم اخزيك يا شيطان .. وبيدفعوا علشان يحضروا الحفلة
بتاعته 500 جنيه .. قولى 100 ماشى .
تعالى إنتى كده قوليلهم إن نادية طه منزّله كتاب بــ 50 جنيه ..
بلاش .. بــ 5 جنيه .. طب كل كتاب عليه كتاب هدية .. طب خد
الهدية وبلاش الكتاب .. هههههههههه .. ولا حياة لمن تنادى .
أنا إن كنت ببالغ فى بعض المواقف بس فيه جانب كبير من اللى حاصل
فعلا ..
وبالرغم من كده أرجع وأقول إنو فيه شباب برضو مثقف وواعى ..
يعنى فيه كده وفيه كده ..
بس فئة الشباب التانى ده بدأت تكتر وده اللى قالقنى لأنى خايف إن
قاعة الشباب الواعى والمثقف تنقرض مع الوقت .
آسف إن كنت طوِّلت عليكى ، بس حقيقى فعلا الحوار معاكى له مذاق
خاص .
وتصبحى على خير
مايو 4th, 2009 at 4 مايو 2009 8:45 ص
اخي أمير الجزيرة
انا قطعت الاجازة بعد ضغوط رهيبة وبلاش تقول عليا عيلة
ــــــــــــــــــــــــــــــــــــــ
ايوه كده ربنا يباركلك
طبعا رايي متكرر وقولته قبل كده
شعرك مش محتاج راي
زي الفل والله ولا غبار عليه
وخصوصا انه وليد اللحظة وارتجالي
فطلع بفطرته الحلوة من غير ماتشوهه الحرفنة
وانت فاهم قصدي طبعا
مبارك الادراج الجديد
مايو 4th, 2009 at 4 مايو 2009 8:48 ص
أخي أمير الجزيرة
سابت ضفايرها بخاطرها
سـِكـْنـِتْ بهانة كوافيرها
إيه تعمل الماشطة وغيرها
فى وش له كود متشفـَّر
أضحك الله سنك زي ماضحكتني في كام مقطع
استمر موهبتك حاضرة وفطرية زي الارض المليانة بالخير
ربنا يباركلك
مايو 4th, 2009 at 4 مايو 2009 2:43 م
الله يجازى اللى كان السبب
ولى الأمر ..
فى البيت
و التانى الكبير
كل سنة و انت
وهو
طيب
تحياتى
“”
مايو 4th, 2009 at 4 مايو 2009 5:51 م
أستاذى المحترم جدا عادل سعيد
كل سنة وأنا وهو طيب …… بس
طب وانت يا باشا
الله
إنت معانا ولاّ مع التانيين ؟؟
معانا ؟؟
طيب إحنا بأه التانييييييييين
هههههههههههههه
عادل بك
ما تنكوشنيييييييييييش
أرجوووووووووووك
مايو 4th, 2009 at 4 مايو 2009 5:58 م
ليدى أميييييييرة
من بعض ما عندكم ياباشا
إحنا نيجى فى حضرتكم إيه يا فندم
ونورتى مكتوب من تانى يا نوارة
لا صوت يعلو على صوت الجماهير
وخلاص يا فندم بعدنا عن الحرفنة
هههههههههههههههه
تحياتى
مايو 4th, 2009 at 4 مايو 2009 7:15 م
متخاصمين بالتلاته
_~
مايو 4th, 2009 at 4 مايو 2009 7:49 م
… شوف الموضوع ده … ما يتسكتش عليه ……
دخول مدونتك .. اشبه بدخول مجلس الوزراء ..
صعب … وعليه حراس …….
مايو 4th, 2009 at 4 مايو 2009 7:52 م
… الست ناديه طه ….
دلوعة اسكندريه …
واقفين فى الطابور بقالنا ساعة .. عاوزين نعلق ..
خلصى …… صورتك عســــل .. هما بتوع اسكندرية
معسلين كده …………………
مايو 4th, 2009 at 4 مايو 2009 8:01 م
… اما عن الادراك … وحمى القصيدة … وسلاسة الكلمات وجزالة
المعنى …. ففيها رائحة بيرم التونسى .. بغزارته اللفظية
وتمكنة من اللغة واحكام الضغط عليها .. لتخرج كل ماعندها
.. من لغة انسانية مصرية صميمة المصطلح … مصرية الايقاع
فى غذوبة الفلاسفة .. وسخرية اولاد البلد …
….. خلاصة القول ..
أنت محترف انســـــانية ….
شديد التألق كنجوم السينما فى المؤتمرات الصحفية
فلســـفة عاقلة .. هادئة …
فى النهاية … أنت لا حــــل لك ….
مايو 5th, 2009 at 5 مايو 2009 3:37 م
أمير الجزيرة
لفت نظرى و فى زيارة ثانية خلال 24 ساعة
فيروز
يا الله
ما روعة فيروز
الشاعر لا يكون شاعرا إلا اذا تذوق شعر و كلمات و أداء فيروز
أنت عملتلى خدمة بكده
شكرا
“”"
مايو 5th, 2009 at 5 مايو 2009 6:58 م
Wahdah Wahedah قال:
مايو 4th, 2009 at 4 مايو 2009 7:15 م تحرير
متخاصمين بالتلاته
_~
…………………..
كده يا مروة ..
متخاصمين ؟؟
ومش كده وبس .. وبالتلاته كمان ؟؟
معنى كده إن احنا علشان نتصالح
يلزمنا مُحـَلـّل .
هههههههههههههه
مخاصمنى ؟؟
ما تقدرش …
_00000___00000_____
__0000000_0000000___
__000000000000000____
___0000000000000____
____00000000000___
______0000000____
________000_____
_________0_____
_________ 00____
___________ 000_
______________ 00___
_____________ 0___
___________ 0
____________ 0*´¨)
______________¸.•´¸.•*´¨) niiiiiice¸.•*¨)
_____________(¸.•´
…………………………
….oooO…………..
…..(….)…Oooo…
…../..(…..(….)….
…..(_/…….)../…..
……………(_/…….
… I WAS …………
………. HERE …….
………………………..
خلاص ؟؟
مايو 5th, 2009 at 5 مايو 2009 7:03 م
نورهان صلاح
ثانية واحدة يا نور
……………
إنت يا بنى إنت وهوّ
شايفين القمر ده
لأ مش اللى فى السما يا أغبيا
النور اللى منورنا هنا ده
دى ستـّكم وتاج راسكم .. نورهان صلاح
تيجى ماتستناش .. المكان مكانها
وخلـّوا بالكم .. دى بنت بميت راجل .. آه
يا فرج ….. سمعت ولاّ لأ ؟
- تحت أمرك يا باشا .
مايو 5th, 2009 at 5 مايو 2009 7:10 م
إنت ما صدقت و اللا إيه ؟
^_^
دا انا باستفسر بس
لقيتك ما صدقت
كده برده؟
~_~
آند آى واز هيير برده
هه بس
مايو 5th, 2009 at 5 مايو 2009 7:21 م
لاااء لااء
دى الست نادية طه تبقى وزيرة الحقـّانية هنا
بالراحة شوية يا نور
بس يا بحر ..
مايو 5th, 2009 at 5 مايو 2009 7:24 م
أستاذى عادل سعيد
إنت تأمرنى يا باشا وأى خدمة شوف حضرتك بتحب مين تانى من الزمن
الجميل وأنا أحضرهولك هنا بعون الله .
وجودك هنا والله شرف لى ورفع من قدرى
تحياتى وتقديرى
مايو 5th, 2009 at 5 مايو 2009 7:47 م
وحيدة
الثائرة
يا سلااااااام ياريتك تواز واز هنا على طول
دا يبقى يوم المنى ..
آى ويل كومز تو يو آز سون آز يو آر سمايل بدون ing إنفينيتيف
على طول .
سمايل بأه ..
يا ساتر
مايو 6th, 2009 at 6 مايو 2009 9:00 ص
^_^
مايو 6th, 2009 at 6 مايو 2009 6:43 م
اخى الفاضل امير الجزيرة
مش عارفه اكتب اقولك ايه
مش لاقيه اى تعليق غير انى
قرأت صورة كامله ومعبره جدا على حال بعض الشباب والبنات
وليس الكل علشان متظلمش حد ياامير
وربنا بشوف فعلا موضه الجينز الواقع بكون نفسى ارفعله بنطلونه
هههههههههههههههههههه
والبنت استغرب ازاى مامتها تخليها تخرج كده
لكن الى جانب السلبيات دى فيه شباب كتير ايجابى وتفكيره يفرح
ونفتخر به
نرجع لكلماتك وسيمفونيتك الرائعه والخفيفه
واقولك يسلم لنا نبض قلمك يمتعنا
تحيتى واحترامى اميرنا
مايو 7th, 2009 at 7 مايو 2009 12:28 م
أخي أمير الجزيرة
علي اخر مرمطة …خد له عيش وحلاوة…….وميكروكروم
تحياتي
مايو 7th, 2009 at 7 مايو 2009 4:34 م
أخي امير الجزيرة
طبعا لانك من المدونين المثقفين المحترمين فانا باثق في رايك اللي مافيهوش مجاملة
وعشان كده كلامك قلقني بجد
في ناس داخلة تقولي ماتبطليش وكملي وعاوزين الجزء الجديد
واللي قرا اتبسط وضحك
مش عارفة …انا كان رايي ان علي مجرد فرصة لنقد سلبيات المجتمع المصري من خلال حياته في مصر
وبعدين ليه تعتبره فيلم ممكن تعتبره مسلسل يومي زي عيلة مرزوق
ههههههه
عموما رايك يفيدني طبعا ومن باقي التعليقات هالاظ ردود الافعال
وجايز اعمل استفتاء
ههههههههههههه
تحياتي
مايو 7th, 2009 at 7 مايو 2009 11:50 م
أيها الهارب مجدداً
أتسأءل:
ما الذى حدث؟!!
مايو 9th, 2009 at 9 مايو 2009 1:08 ص
مساء الخير امير ..الامراء
والان …..
ينتظركم … الجزء الخامس …
لا تتاخروا ….
تحياتى ….
ناديه طه
مايو 10th, 2009 at 10 مايو 2009 12:25 ص
أخي الفاضل أمير
لم أجد شيئا أعبر به سوى أنني أنحني تقديرا أمام حرفكم الصاخب الذي قل نضيره في عصر الحداثة .
شكرا لكم وتقبلو فائق إعتزازي وتقديري
مايو 10th, 2009 at 10 مايو 2009 9:21 ص
تايه بتفعل ما بدالك
خالط حرامك بحلالك
يا عم لـِمْ أنجالك
بـَدَل ما تلقى العار جالك
- ايه الحلاوة دى ياخويا - روعه بجد
- وخطيرة وجامدة
- بص بقى - والنبى انقلهالى عندى ينوبك صواب
- دمت بخير
-
مايو 10th, 2009 at 10 مايو 2009 9:26 ص
مدونتك صعبه جدا فى دخولها
من فترة وانا مش عارفه ادخل - مش عارفة ايه السبب
-
مايو 10th, 2009 at 10 مايو 2009 1:50 م
جروب جريدة الصباح العربي بيت المدّونين العرب
http://www.facebook.com/group.php?gid=78080770039
مايو 10th, 2009 at 10 مايو 2009 3:55 م
أختى هدى
رفيقة الكفاح واللى لسه مداينانى برغيفين عيش
مدونتى صعبة فى الدخول ليها ؟؟
ما يصعبش عليك غالى يا جميل
خلاص أنا نبهت على البودى جاردات اللى واقفين على الأبواب إنهم
أول ما يشوفوكى يفتحولك السكة على طول من غير تفتيش .
على فكرة علا حقيقى كتير بيشتكوا من الموضوع ده .
بس أنا صعبان عليـّا بصراحة أتخلى عن أى حاجة من المعروض على
الواجهة واللى هى مسببة التقل ده .
هحاول أخفف بس يارب ما أخدش برد .
أما بالنسبة لطلبك بنقل الزجلولة اللى عندى عندك
فبس كده ؟ يا سلام .. أوى أوى
هتلاقيها كلها هناك
بس ممكن كلمة على جنب كده ؟؟
معلش ممكن بس مصاريف النقل علشان أحاسب السواق ..
مايو 11th, 2009 at 11 مايو 2009 12:52 م
هههههههههههههه دانت استاذ
جميله فعلا
مايو 11th, 2009 at 11 مايو 2009 12:56 م
على فكره المدونه بتفتح بصعوبه
جايز من الفيديوهات والصور الكتيره
حاول تخفف منهم شويه علشان تكون ساهله فى الاطلاع على محتوياتها
مايو 11th, 2009 at 11 مايو 2009 3:15 م
يا امير الجزيرة انتظرنى اخد نفسى
انا تعبت واتزليت فى انتظار ان صفحتك تحمل وتفتح
وفين وفين لما فتحت قرأت كلماتك المعبئة بالهموم
ونا كلى هموم وقربت انفجر
فاسمح لى اغادر الجزيرة قبل الانفجار
حتى تظل الجزيرة هادئة
تقبل مرورى وتقدرى ايها الأمير
وشوفلك خل فى صعوبة تصفح مواضيعك اوك سلام
مايو 11th, 2009 at 11 مايو 2009 10:35 م
بس على فكره مواضيع شرح قوالب المدونه وشرح تغيير الاستيل عندك موضوع ممتاز وكل لما واحد يطلب منى الشرح بارسل له رابط مدونتك ربنا يجعله فى ميزان حسناتك
مايو 11th, 2009 at 11 مايو 2009 10:45 م
حيوانات مكتوب ومنافقيها
معتز خله (عرباوى )
ابو الفرقد
نور الدين
http://mgnonngeb1.maktoobblog.com/1456549/1456549/#comment-3
ادخل وشوف المدونه دي هتفيدك كدا
الاخوه والاخوات
السلام عليكم ورحمة الله وبركاته
لما نشوف مين بيقول الحق؟
ههههههههههههه
مايو 12th, 2009 at 12 مايو 2009 10:49 م
مسائك سكر ايها الامير ….
مرور للسلام على الجزيرة …
رائعة لك …..وفقك الله ….
اختك دجلة …..
يوليو 16th, 2009 at 16 يوليو 2009 11:09 م
انا كتبت بالامس القريب تعليق زجلى ولم اجده اليوم اشكو اليكم لوعتى لذلك لان اى زجل لى انا ارتجله فور القراءة الله يسامح من كان السبب لكن قولوا لى من السبب النت ولا العين؟