راضى … و … هنية
كتبهاأمير الجزيرة ، في 19 يونيو 2008 الساعة: 13:59 م
هذا الإدراج أعرض فيه بأسلوبى الخاص حال طبقة واسعة من المجتمع - المصرى خاصة - حالها مثل حال شخصيتنا التى أعرضها ، وهى شخصية رجل كادح مكافح إسمه راضى … وهى للعلم شخصية من خيالى البحت … وقد تعرضت فقط للخطوط العريضة الأساسية فى حياته بأسلوب قد يكون ساخرا ولكنه فى الحقيقة واقعى جدا …
فتعالوا نشوف عمنا راضى هيأولنا إيه …
إتفضل يا عم راضى …
دئيئة واحدة من فضلكم
مش هاخد كتير من وأتكم
…..
هاحكى حكايتى واسمعوها
ياريت تحاولوا تفهموها
هى حسبه هتحسبوها
باين عليكوا ولاد حلال
…..
محسوب جنابكم إسمه راضى
شغال فى شركة نظام ورادى
عمرى فى حياتى ما كنت فاضى
عندى سعادتك أورطة عيال
…..
مطحون ودأنى منبتة
بلبس هدوم الصيف شتا
حياتى ماشية مكلفتة
شأيان وشكلى حاله حال
…..
بستنى طلعة كل شهر
والشهر يعدى عليا دهر
تؤولشى يعنى مستنى مهر
طول عمرى ماشى بالحلال
…..
أول ما بأفش المهية
بعد فيها كل شوية
واخدها واجرى على هنية
اللى هى طبعا أم العيال
…..
إديتها كل اللى أبضته
وجنيه فى جيبى أومت حطه
برمت بوزى ورحت مطه
ومشيت انا باتنين ريال
…..
يالا بأه يا هنيه
إعمليلنا أكلة تكون مرية
تصلبلى طول الحيل شوية
بدال ما ناملك زى الشوال
…..
أكلنا الأكلة اللى مستنظرينها
وبحبة شاى أومنا حبسينها
وعيالنا رحنا منيمينها
وعملت فيها ابو الرجال
…..
وفى خمسة منه لأيتها جايه
وفإيدها ماسكه طاسة أليه
بتأولى عايزه األى طعميه
وفلوسنا خلصت يا بو جمال
…..
إيه اللى خلصت يا مدام
عارفه انتى النهارده كام
وطعميه حتى مش حمام
ودخلت معاها فى دور جدال
…..
ردت عليا بصوت غليظ
كإنه صوت عبد الحفيظ
بطل تؤول كلام يغيظ
إإصر الشر يا بن دلال
…..
رحت ساكت وبطلت اهاتى
وأول فى سرى وصوتى واطى
خلاص نويتى ابأى نباتى
الله يسامحك يا ام منال
…..
ما كنت آعد جنب أمى
باكل وبشرب ومستحمى
بمسح فى فوطه مش فى كمى
دماغى فاضية وخالى بال
…..
آدى حكايتى باختصار
والله جد مش هزار
دا اللى بناخده باليمين
بيروح فى ثانية بالشمال
ـــــــــــــــــــــــــــــــــــــــــــــــــــــــــ
التصنيفات : شعر عامى | السمات:شعر عامى
أرسل الإدراج | دوّن الإدراج
يونيو 19th, 2008 at 19 يونيو 2008 3:23 م
والله معاك حق
كلماتك روووعه
فعلا انت مبدع
الله يوفقك
يونيو 19th, 2008 at 19 يونيو 2008 3:49 م
العازفة الحزينة …
شكرا لمرورك بجزيرتى … وتعليقك العذب …
أنا فين والإبداع فين … على العموم أهى حاجة ببلاش كده …
دمتى بكل ود واحترام …
يونيو 21st, 2008 at 21 يونيو 2008 10:45 ص
أمير جزيرة الحب ..
بجد بجد عجبتنى جدااااااااااااااااااااااااا القصيدة
عجبنى بساطتها وعاميتها ورغم انى قعدت اضحك ضحك بس للأسف بعدها بشوية فكرت فانها مش مجرد حكاية او غنيوة
ده حال فئة كبيرة جدااااااااااااا فى المجتمع
ناس بسيطة ،، ملاليم هى دخلهم ورغم كده راضيين ومبسوطين
كل اللى بيشغلهم ازاى يقدرو يوفرو أكلة لعيالهم وازاى الفلوس تقضيهم لاخر الشهر
،، فى حين ان ناس تانية معاها ملايين وعمرها ما عرفت معنى السعادة
انا بحب جدا اننا نناقش قضيه خطيره ومهمه بس بطريقة سخرية وبسيطه
عشان السخرية بتبقى نوع من النقد الفعال لانه بيوصل المعنى أسرع
(شر البلية ما يضحك)
تحياتى لك وأتمنى ان تعرض المزيد من قاضاي بلدنا الحبيبه بتلك النبرة الساخرة الناقده
مودتى ..
يونيو 21st, 2008 at 21 يونيو 2008 2:26 م
السلام عليكم
الاخ الكريم امير الجزيرة
شكرا لمرورك الكريم ولكلماتك الصادقة
اتمنى ان تاخد ادراجي الاخير على محمل التمثيل وليس الحصر….
يسعدني كثيرا ان تكون احد زواري الدائمين وربما لم اضفك الى اللائحة فقط لان الصدفة لم تمكني من التواصل معك….
يشرفني اخي التواصل معك فنحن جميعا هنا اخوة
ساعود الى مدونتك للقراءة والتعرف عليها اكثر بعد حين
تقبل مني خالص التقدير والاحترام
يونيو 21st, 2008 at 21 يونيو 2008 8:18 م
خفقات قلبى … ألف حمد الله عالسلامة …. الشاى يا هنية .. ههههههههه
وشك .. أصدى حضورك ولا حضور القمر … مش خلصنا إمتحانات ؟؟؟ ….
آاااه … النوم والكسل والتليفزيون !!! … أجازة بأه …
على فكرة إنتى قرأتى إدراجى العامى اللى أبل كده اللى بعنوان مصر وولادها ؟؟؟
ياريت تقرأيه وتأوليلى رأيك فيه … هو موجود تجت خالص ومكتوب باللهجة الصعيدية مع العلم إنى مش صعيدى ويكون لى الشرف طبعا لو أكون …. وأنا كنت بهديه أساسا للخال عبد الرحمن الأبنودى …
بالمناسبة بأه أأولك على حكاية على بال ما الشاى ييجى …. أأعدى أأعدى يا شيخة …
بيأولك كان فيه زمان فى قرية فى المنوفية فى الريف … طبعا مش ها أولك إسم القرية إيه أكيد عارفاها … كانت البوسطة .. البريد يعنى بيوزعها بوسطجى على حمار … وكان الراجل ده غلبان وعنده أورطة عيال زى عمنا راضى كده … المهم جه فى يوم والراجل ده مات .. ربنا يدينا ويديكى طولة العمر … طيب عياله هيصرفه منين ؟؟؟ .. آموا الناس الموظفين اللى فى البوسطة إقترحوا إقتراح … إن الحمار عارف الطريق كويس من البوسطة العمومية اللى فى المركز لغاية بوسطة القرية … آلوا يسيبوا الحمار شغال لوحده وأهو المرتب اللى كان بيخده الراجل البوسطجى الغلبان اللى مات يندفع للحمار و يخدوه أهل الميت يصرفوا منه … المهم تلف السنين والأيام … ويثبت الحمار جدارته فى شغلته … وأعد يتدرج فى المناصب لغاية ما بأى رئيس جمهـ ….. يا نهار ما لوش لون … روحنا فى داهية … أومى اجرى على مدونتك اجرى … علشان أنا سامع صوت سرينة بوليس … كبسه …. ههههههههههه
سلاااااااااااااااام
يونيو 21st, 2008 at 21 يونيو 2008 8:32 م
يعنى أنت قصدك تقول أن الحمار ده أترقى لغايه ما بقى رئيس جمهورية الحمير
ههههههههههههههههههههههههههههههههههههه
ههههههههههههههههههههههههههههههههه
أيه ده أحنا فينا من كده ؟؟
لألأ انا مع أول .. هقر عليك على فكره وهقول انك الرأس المدبر
انا داخلة جزيرة الحب ولا جزيرة المعتقلين هههههههههههههههههه
يجعل كلامنا خفيف عليهم
حلوة اوى قصة الحمار ديه وطبعا هى مش حقيقية رغم انها مؤثرة اوى
وبعدين انا هعرف منين اسم القرية ازاى !!
انا جذورى من الصعيد اصلا ،، أزيك بجى ؟؟
عموما خلصنا أمتحانات اه ربنا ما يعيدها تانى ،، بس شوية نت وشوية تليفزيون وشوية خروج ،، اهو بنوع
وسكى على الشاى يا هنية عشان مش بحبه ..
عامة هقرأ أكيد الادراج وهقولك رأي فيه
تقبل مرورى ومودتى ..
يونيو 21st, 2008 at 21 يونيو 2008 8:35 م
الرائدة عاشقة الورد …
النهارده كده يوم عيد … وأول زيارة ليكى هنا بالجزيرة زادتنى شرفا وبهجة … ومعلش معرفش بروتوكول أول زيارة إيه … ويارب ما تكون الأخيرة … وتدوم الزيارات المتبادلة على طول … وإوعى تبطلى كتابة أو تدوين … إحنا لسه أمامنا الكثير …
شرفتينى جدا جدا … وطبعا يهمنى رأيك فى إدراجاتى بجزيرتى المتواضعة
دمتى ودام مكتوبك ..
يونيو 22nd, 2008 at 22 يونيو 2008 6:08 م
~~~~~~~~~~~~~~~~أحبتي في الله~~~~~~~~~~~~~~~~~~~~~~~
السلام عليكم ورحمة الله وبركاته
STOP
لا أدعــــوكم هذه المــــــرة للجديـــــد…. وإنمـــا دعوتــــي للتجديـــــــــد
أحبتي في الله
الغايـــــــــــــــة مـــن اجتماعنــــــــــــا هنــــــــــا هو التـرابط والأخــــــــــــــــوة
والمحبــــــــــــة في الله… فلنعمــــــــل لنحقق التغييـــــــر في أمتنـــــــــا
فالأمــــــــة بحـــــــــــــــــاجة لأقلامــــــــــنا… وبحــــــاجة مــــاسة وملحــــــــــــة
للعمــــــــــــــل بمـــــــا نقول.. فحسن القول و تصديق العمل غاية أمتنا المنشودة.
“”"”"”"”"”"”"”"”فلتكن أقلامنا شاهد لنا لا علينا”"”"”"”"”"”"”"”"”"”"
~~~~~~~~~~~~~~نحبكم في الله~~~~~~~~~~~~~~~~~~~~~~~~~
يونيو 22nd, 2008 at 22 يونيو 2008 10:40 م
الأخت الفاضلة … نسرين أيراهن
الحمد لله الذى أنعم علينا بنعمة الإسلام … وكفى بها نعمة …
أحبكى الله الذى أحببتنا فيه …
شكرا على مرورك الكريم …
يونيو 23rd, 2008 at 23 يونيو 2008 1:00 ص
السلام عليكم
بـِأي رِجـــلٍ تَرْقُـُـــصْ؟
دعوة لقراءة جديدي
خالص تقديري
يونيو 23rd, 2008 at 23 يونيو 2008 4:27 ص
الرائدة عاشقة الورد …
شكرا على دعوتك الغالية … وإلى هناك إن عاجلا أو آجلا …
دام الود والتواصل …
يونيو 24th, 2008 at 24 يونيو 2008 11:54 ص
السلام عليكم
اخي الكريم
ماجاء في ادراجك حقيقة ليس خيال…هذا هو حال الفئة المطحونة من المجتمع…راتب على قد الحال يخلص في أول يومين من الشهر…اخترت نموذج راضي وهو نموذج موجود بكثرة…لكن ما عجبني وأراحني هو الايمان الذي يتسلح به …والحياة التي يرضى بها غير قهر الحياة….انه الرضى بالحلال….
اللهم أنعم برحمتك على كل مقهور صابر فانت اعلم العالمين..
شكرا اخي لدوام تواصلك
لك خالص تقديري
يونيو 25th, 2008 at 25 يونيو 2008 12:04 م
أمير الجزيرة …
خيراً !! ماذا يحدث عندى ؟؟
لا افهم ماذا تقصد … أرجو التوضيح
مودتى ..
يونيو 27th, 2008 at 27 يونيو 2008 6:31 ص
اخي امير الجزيرة : بوح راق ,,, قلم مبدع ,,,,مداد متجدد ,,,
من قصيدتي الجديدة :
اهلوك سيفان إمَّا في الوغى التقيا ==== سيف التنائي وسيف الحق من فيها
لن يجني الشوك الا غاصب عفــــن ==== وليقطف النصر من بالدم يفديهـــــــا
تحياتي لك
يونيو 27th, 2008 at 27 يونيو 2008 4:59 م
أخى حادى العيس …
صراحة وأقولها حقا لا نفاقا أو رياءا … لم أجد فى مكتوب من يكتب الشعر العربى بمثل هذه البلاغة والفصاحة اللغوية … شعر يتنفس … شهيقه حب وزفيره صدق …
لم أجد من الكلمات ما أشكرك بها على أنك قد أخذت بيدى إلى مدونتك الراقية …
وأقول هذا ليس لمجرد التعليق … ويعلم الله كم أنا صادق فى حديثى …
جل احترامى وتقديرى
يونيو 28th, 2008 at 28 يونيو 2008 9:12 م
هفت عليا روح بيرم التونسي الله يرحمه
يونيو 28th, 2008 at 28 يونيو 2008 11:03 م
أبى سعيد سرور …
ربنا يخليك ويكرم أصلك … وأنا سعيد جدا إنى فكرتك بالراجل الشاعر العظيم ده …
عمنا وعم عمنا ….
دمت بوافر الصحة والسعادة