كيف تضيف أغنية فى مدونتك

بسم الله الرحمن الرحيم

فى مستهل حديثى أود أن أهدى هذا الإدراج إلى الأخت الرقيقة صاحبة مدونة ( خفقات قلبى ) شخصيا … ويلا ياستى إعلان كمان ببلاش أهه … وبقول ليها غالى والطلب رخيص ….

وأيضا إهداء أيضا لكل من وطأت قدمه أرض جزيرتى … بل جزيرتكم جميعا

( جزيرة الحب ) …

فخيركم من تعلم العلم وعلمه ……. وخير الناس أنفعهم للناس

وأود أن أشير إحقاقا للحق بأن هذه المعلومات قد إستقيتها من شبكة الإنترنت وليست من إبتكارى .. كل ما هنالك أننى سوف أشرحها بصورة بسيطة سهلة الفهم كى يستطيع كل مدون أن يضيف ولو لمسة جميلة لمدونته ، وأؤكد مرة أخرى أن هذا الموضوع قد سبقنى له الكثيرون الأكثر منى علما ومعرفة.

نبدأ على بركة الله

أولا :-

لازم تكون الأغنية موجودة باستمرار ، وبالتالى لما أى زائر يفتح مدونتك الأغنية تشتغل على طول ، وده عمره ما هيكون متاح بصورة أفضل إلا إذا كانت الأغنية موجودة على أحد مواقع الأغانى بالنت وممكن تسمعها لايف مباشرة من على هذا الموقع وبالتالى تضمن إن الأغنية دايما موجوده .. وبالتالى يتم إستدعائها فى أى وقت عند فتح أى زائر للمدونة بتاعتك ، وأنا رشحت لكم بعض من هذه المواقع فى الروابط التالية :-

http://www.salmiya.net/

http://www.mazikana.com/

http://www.sawari.com/

أنا شخصيا واضع الأغنية اللى شغاله دى من موقع السالمية صاحب الرابط الأول فوق. طب إزاى  ؟؟… أولتولى إزاى …

الأول هندخل على الرابط وليكن موقع السالمية سواء بكتابتة فى خانة العنوان ببرنامج الإنترنت إكسبلورر أو أياً ما كان المتصفح اللى إنت بتستخدمه أو تاخده من هنا كوبى Copy وبعدين بيست Past فى سطر العنوان .. زى ما انتوا عاوزين .هيفتح معانا الموقع .. ومن تبويب الأغانى زى ما واضح فى صورة رقم 1 هنختار أى نوع من الأغانى إحنا عاوزينها

صورة رقم ( 1 )

وبالضغط عليه هتظهر لنا الصفحة التانية زى اللى فى الصورة رقم 2 هنختار منها المطرب المفضل لينا حسب المجموعات

صورة رقم ( 2 )

فتفتح صفحة تانية فيها أغانى المطرب ، وأمام كل أغنية كلمتى إستماع وتحميل ، نضغط على كلمة إستماع زى صورة رقم 3

صورة رقم ( 3 )

هتبتدى تشتغل الأغنية ببرنامج الريال بلاير اللى لازم يكون موجود على الجهاز عندك ونستنى لغاية ما الأغنية تشتغل خالص ويظهر السطر اللى متعلم فى صورة 4 هنضغط عليه لعرض معلومات الأغنية

صورة رقم ( 4 )

هتظهر معلومات الأغنية فى نافذة أخرى كما فى صورة 5 

صورة رقم ( 5 )

ويهمنا السطر اللى أنا علمته فيها ، هنحدده بزر الماوس وهناخده كوبى وبيست فى أى حته وليكن مثلا فى صفحة وورد أو نوت باد ونخلى بالنا منه على شان هنحتاجه دلوأتى.

ملحوظة :- أنا ليه بفضل الأغانى اللى بتشتغل ببرنامج الريال بلاير واللى إمتدادها غالبا بيكون rm أو ram لأنها بتكون أصغر حجما من الأغانى اللى بتشتغل مع برنامج الويندوز ميديا بلاير واللى موجود أساسا على كل الأجهزة وبيكون إمتدادها فى الغالب mp3 وبالتالى أغانى الريال بلاير بتشتغل أسرع لأنها أصغر فى الحجم وسهلة فى التحميل.

نيجى دلوأتى للخطوات الأكثر أهمية واللى إحنا مستنيينها ، ركزوا بأه معايا

الكود 

كود الريال بلاير القديم

<p align="center"><embed src="ooooo" width="190" height="60" type="audio/x-pn-realaudio" autostart="true" loop="true"></embed></p> <p>

كود الريال بلاير الحديث

<p align="center"> <param name="BACKGROUNDCOLOR" value="#000000" /><embed src="ooooo" width="190" height="30" type="audio/x-pn-realaudio-plugin" border="0" console="Clip1" controls="ControlPanel" autostart="true"></embed></p> <p>

 الكود ده معمول علشان يشغل الأغنية اللى إحنا إخترناها داخل صفحة المدونة بتاعتك ، فاكرين الرابط اللى إحنا محتفظين بيه بتاع معلومات الأغنية هنجيبه كوبى ولصق مكان كلمة ooooo اللى موجودة فى الكود ونحافظ على علامات التنصيص دى  اللى كلمة ooooo مكتوبه بينها يعنى رابط معلومات الأغنية هييجى مكان كلمة ooooo اللى فى الكود بالظبط.

autostart=true تعنى أن الأغنية سوف تعمل تلقائيا بمجرد فتح الزائر صفحة مدونتك ولإلغاء هذه الخاصية يمكن أن نكتب بدلا منها autostart=false وهذا يعنى أن الأغنية لن تعمل تلقائيا بمجرد فتح صفحة مدونتك ، وإذا أراد الزائر تشغيل الأغنية سوف يقوم بالضغط على زر البلاى فى البوكس ، يمكنكم التعديل كما تشاءون.

بعد التعديل والذى منه أو تركه كما هو أصبح الكود الآن جاهزا للإستخدام ، طيب هيستخدم فين وإزاى ؟؟ نأول.

الآن نأتى لكيفية إضافة الكود للمدونة ، هتدخل لمدونتك باليوزر نيم والباسوورد بتاعك زى ما بتعمل لما تيجى تضيف إدراج جديد , عادى يعنى ، هتفتح معاك صفحة إدارة مدونتك كما فى صورة رقم 6

صورة رقم ( 6 )

واختر تبويب القالب ثم إضافات للقالب ومن ثم إتبع الخطوات التالية بالترتيب :

1. حدد الأول إنت عاوز تضع الملف الصوتى فين بالظبط فى مدونتك ، فى الترويسة أو فى أعلى الجانب الأيمن أو أسفل الجانب الأيمن أو فى أعلى أو أسفل الإدراجات ، بص زى ما انت عايز بس لازم تحدد أو تضغط على المكان الأول اللى انت عايز الملف الصوتى يكون فيه ، زى ما هو موضح فى خطوة رقم 1 فى الصورة.

2. إضغط على أمر أو كلمة شفرة المصدر زى ما هو موضح فى خطوة رقم 2 فى الصورة.

3. إنسخ الكود المضاف إليه عنوان الملف الصوتى اللى إحنا عملناه قبل كده والصقه فى المكان الموضح بالخطوة رقم 3 فى الصورة.

4.   إضغط مرة تانية على كلمة شفرة المصدر.

5.   إضغط حفظ زى ما هو موضح فى الخطوة رقم 4 فى الصورة.

أخرج بأه خالص وروح إسمع أغنيتك هناك وأى خدمة.

ولو فيه أى إستفسار أو خطأ أنا تحت أمركم والجزيرة مفتوحة للجميع.

مع تحياتى

إذا لم يؤتى الشرح السابق ثمارة فيمكنك الإستعانة بمشاهدة الفيديو التالى ، فما عليك إلا الضغط على زرالتشغيل لمشاهدته ، كما يمكنك عرضه بكامل الشاشة full screen وذلك بالنقر على نافذة العرض مرتين بزر الماوس .

شــرح فــيــديــو

إلى هنا نكون قد انتهينا من الشرح مع وعد بلقاء قادم إن شاء الله .

وأى سؤال ، أترك تعليقك به سؤالك أو طلبك ، وسأرد عليه بمشيئة الله.