فى يوم صِحِيتْ لَجِيتْ الحَلْجْ فيه غُصًّةْ

وسْمِعْتْ صوتِكْ يامصر بينادى

صوت أنين بناى حزين الهَمْ فِيهْ حَسًّهْ

عَمًّالْ بِيُعْصُر عَصْرْ فِفؤادى

رَفَسْت الْغَطا اللِّى عايزلُه مِيتْ رفْسَةْ

وجِريت عَلِيكى يا امًّايا يا بلادى

ألبسْ ضَبابْ أركبْ سَحابْ مِشْ هِىًّ دِى الجِصًّةْ

دا جَبْر خاطْرك عِنْدِى بِوْلادِى

ياساكْنَة جَلْبى ونَهْر شِعرى عَلِيهْ بَصًّةْ

نهرْ وارْثُهْ سابْهُولِى أجْدَادِى

يجُولوا يخْلَصْ أجُول واللهِ لأ لِسًّهْ

نَدر ٍ عَليًّهْ أسِيبُه لاحْفَادِى

جِيتلِك لَجيتِكْ فارْدَة شَعْرِكْ الدًّهَبى

اللى ما حَدْ شافُهْ غِيرْ خَالِى أبْنودِى

لمًّا كُنْتى عالتِّرْعَة وْحَلًّه دِى الجُصّةْ

لِسًّاكِى فاكره ولاًّ نَسُّوكى

دِى التِّرْعَة ناشْفَة ما فِيها وَلا نُجْطَةْ

طَبْ فين ولادِكْ ييجوا يسْجوكى

إخِّيهْ عَليكوا يا وْلادْها يا عِيرَةْ

راحوا فِين ولادِ الـْ …إيهْ وسَابوكى

هَمِّلوكى …..؟

فالْحِين فى الكَبْشْ والهَبْشْ والجَرْىْ على بَرًّةْ

يَكْلوكِى لَحْمْ وانْ صِرْتى عَضْمْ يرْموكِى

جَسِّمُوكِى …..

جَسِّموكى كُلْ واحِدْ ولُهْ حِصًّةْ

دا حتى توبِكْ طِمْعوا فِيهْ وعَرُّوكى

كِيفْ …..

كِيفْ تكون الأزْمَة فى المَيًّة

يامصرى ياللى فى البلد نِيلَكْ

كيف تِسِيبْ الزًّرْعَة والرًّيةْ

وتِسْتِنًّى لُجْمَة من السًّما تْجِيلَكْ

إرْجَعْ لأرْضَكْ واخْلِصِ النِّيةْ

هَتْلاجِى رَبًّكْ مِنْ خِيرْها يدِّيلَكْ

أرْضَكْ دِى عَرْضَكْ حتى دا شْوَيةْ

إوْعاكْ تِسيبها إنْ سِيبْتُهْ يا ويلَكْ

كلام بَجولُهْ لِيــكوا و لِيًّهْ

يمْكِنْ تِحِزْ الكِلمَة يومْ فِينا

دا الأب مَصرى والأم مَصرية

والوادْ بيطْلَعْ طَبْعُه مِشْ لِينا

ما دام بناكُلْ مِنْ إيدِين غِيرْنا

إزِّاىْ هَيطْلَعْ هُوًّ مِنِّينا

دا انْ جُلْتى نَدْوَة ولاًّ جَلْسَة عِلْمِيًّةْ

ما تْلاجِى حَدْ يا حِلْوَة بيْجِيلِكْ

وانْ جالُوا حَفْلَة وَلاًّ رجْصَة شَرْجِيًّةْ

يجْرُوا عَلِيها وْهُمًّه سايبينكْ

يامصر يا امُّ الهرمْ شامِخْ

كانْ فِينْ دا كُلُّه مِسْتخبيلِكْ

إمسحى جبينك ودموعك الغاليةْ

العيبْ مش فيكى فى اللى ساكنينِكْ

الدُّنْيا سُودا والنهار طالعْ

حرام عليكوا اللى بتعملوه فيها

الله ياخدكوا والدعوة دى مِنِّى

أدامْ ما هِىًّ مش عايزة تِدْعيها

خَلِّيكوا جُوًّهْ وحوشوا عنها أعدائها

وحوشْ وجاعْدَه مِتْرَبًّصَة بيها

دى بَرْضُه مصر ولحم اكتافنا من خيرها

لِيهْ نسيبها واجْفَة يوم لِوَحْدِيها

بَلاشْ تهاجروا وتبعدوا عنها

أمًّالْ هَيُبْجَى مين اللى حاميها

آه معاكوا انْ المَوْلَى حارسْها

بَسْ تحِسْ حَتًّى انْ بروحنا نِفْدِيها

ـــــــــــــــــــــــــــــــــــــــــــــــــــــــــ
التصنيفات : شعر عامى | السمات:شعر عامى
أرسل الإدراج  |   دوّن الإدراج